Erik ten Hag është gati t’i japë një tjetër shans Marcus Rashford dhe Jess Lingard. Ky është lajmi i prestigjozes “The Sun”, sipas të cilës hollandezi nuk dëshiron që dy sulmuesit të largohen në verë, që do të jetë dhe momenti kur tekniku do të marrë drejtimin e United.
Rashford ka marrë garancinë e Erik ten Hag, i cili i ka premtuar anglezit se do të aktivizohet sezonin e ardhshëm. Gjatë këtij viti, Marcus u la jashtë kombëtares angleze nga trajneri Southgate, vendim i cili ishte i justifikuar duke marrë parasysh formën e dobët të sulmuesit. Deri më tani lojtari i United ka shënuar vetëm 5 gola në 32 paraqitje këtë sezon. Duke u nisur nga kjo, trajneri i përkohshëm Ralf Rangnick, i ka dhënë më shumë minuta aktivizimi Jadon Sancho dhe Anthony Elanga.
Ndërkohë Jess Lingard gjithashtu po pret një sinjal pozitiv nga Ten Hag, dhe nuk dëshiron të largohet nxitimthi në verë. Sulmuesi luajti si i huazuar tek West Ham, ku shënoi 9 gola dhe 5 asiste në 16 paraqitje me klubin. Por që prej rikthimit tek United, ai nuk është aktivizuar gati fare me “Djajtë e Kuq”. Një burim pranë lojtarit u shpreh:
“Jesse nuk ka qënë i lumtur këtë sezon. Ai mendon se premtimet që iu bënë pasi u rikthye nga West Ham nuk janë mbajtur. Por Ten Hag ka bërë të ditur se do të flasë me të dhe nëse ia del të sigurojë Jesse për rolin e tij në klub, ai mund të qëndrojë. United është ekipi nga i cili Lingard nuk ka dashur asnjëherë të largohet. Por nëse kjo ndodh, një transferim drejt Newcastle do t’i jepte mundësinë t’i gjendej më pranë familjes së tij…”
Megjithatë, gjithçka mund të ndodhë teksa e ardhmja e Lingard dhe Rashford është ende e paqartë.