Erik Ten Hag ka bërë tashmë të qartë faktin se dëshiron të punojë me Cristiano Ronaldon sezonin e ardhshëm. Hollanezi që do të marrë drejtimin e United duke filluar nga sezoni i ardhshëm pranoi publikisht dëshirën e tij që CR7 të vazhdojë të jetë pjesë e “Djajëve të Kuq” për sezonin e ri. Dhe duket se portugezi gjithashtu mendon të qëndrojë.
Ten Hag nuk do t’i bashkohet festës së Ajax në Curacao, dhe do të nisë punën që këtë javë në klubin e tij të ri. Tekniku u shpreh së fundmi:
“Tek United ka shumë lojtarë të mirë. Duhet t’i bëjmë ata të funksionojnë si një skuadër, por veçanërisht Ronaldon, ai është një gjigand.”
Ronaldo ndërkohë është duke shijuar fundin e sezonit, teksa u fotografua në një fushë golfi në Cheshire. Javën e kaluar sulmuesi komentoi për herë të parë mbi Erik ten Hag. CR7 deklaroi:
“Ajo që di për Erik është se ai bëri një punë fantastike me Ajax. Ai është një trajner me eksperiencë, por ne duhet t’i japim kohë. Gjërat duhet të ndryshojnë ashtu siç kërkon ai. Shpresoj të kemi sukses sepse nëse kemi, do të jetë një sukses për gjithë Manchester-in. I uroj atij më të mirat. Jemi të lumtur dhe të emocionuar, jo vetëm si lojtarë, por dhe si tifozë. I uroj më të mirën dhe le të shpresojmë se vitin e ardhshëm do të fitojmë trofe.”
Ten Hag ndërkohë konfirmoi dhe një herë punën e madhe që duhet të bëhet për të rikthyer United në një nga ekipet elitare të Europës. Hollandezi tha për mediat:
“Ka shumë punë për të bërë. Por kështu është me çdo klub. Ka një numër gjërash që duhen organizuar brenda stafit por dhe në përzgjedhjen e lojtarëve. Do të punojmë intensivisht duke filluar nga nesër.”
