Sulmuesi serb i Fiorentinës, Dusan Vlahovic, ka shënuar shumë gola në Serie A për klubin e tij këtë sezon, por një lëvizje e shumëpërfolur drejt Premier League, mund të jetë tashmë në rrezik, nëse kërkesat financiare të lojtarit mbeten ashtu siç janë.
Sulmuesi i Fiorentinës, i cili ka kapur shifrën e 19 golave në 22 ndeshje në të gjitha kompeticionet këtë sezon, dëshiron një pagë prej 200,000 paundësh në javë, një shifër kjo relativisht e lartë dhe në Premier League. Ndërkohë nga ana tjetër, Fiorentina këmbëngul se nuk ka ndërmend të heqë dorë nga kartoni i Vlahovic për më pak se 70 milionë paundë. Duket se e gjithë kjo situatë i ka limituar shumë alternativat e sulmuesit.
Manchester City është linkuar shumë herë për një afrim të mundshëm të ish-sulmuesit të Partizanit të Beogradit, por trajneri i “qytetarëve”, Pep Guardiola, ka hedhur poshtë fjalët se kjo do të ndodhë, të paktën së shpejti. Ai tha të enjten se, pavarësisht largimit të sulmuesit Ferran Torres drejt Barcelonës për shifrën e 55 milionë paundëve, kampionët anglezë nuk do të sjellin një zëvendësues për të në merkaton e janarit.
Kjo potencialisht hap derën për rivalët e City në Premier League për të marrë Vlahovic, i cili ka refuzuar një marrëveshje të re me Fiorentinën. Arsenal, Tottenham dhe Chelsea janë të gjithë të përfshirë, por dhe ata hezitojnë të thyejnë strukturat e tyre përkatëse të pagave në mënyrë që të fitojnë shërbimet e shtatëlartit.
Juventus është gjithashtu i interesuar për serbin, por “Zonja e Vjetër” e ka shumë të vështirë të mbledhë shumën e nevojshme që kërkohet nga Fiorentina, për të arritur në një marrëveshje brenda merkatos së janarit.
Skenari me më shumë mundësi për t’u realizuar është ulja e pretendimeve financiare të sulmuesit, i cili nëse nuk e ndërmerr këtë hap, rrezikon të mbetet pjesë e ekipit të tij aktual.