Arsenal ka gjetur akordin me Chelsea për transferimin e Jorginho në Emirates. 31 vjeçari italian iu bashkua bluve të Londrës në vitin 2014 për shifrën e 50 milionë paundëve, por Arsenal do t’i paguajë tashmë Chelsea, vetëm 12 milionë paundë për mesfushorin. Kjo dhe për shkak të faktit se italianit i skadon kontrata aktuale në fund të këtij sezoni.
Lojtari është momentalisht duke kryer vizitat mjekësore në Londër, dhe do të nënshkruajë një kontratë 18 mujore me Arsenal, pra deri në fund të sezonit të ardhshëm. Arsenal ishte në kërkim të vazhdueshëm të përforcimeve në mesfushë, dhe refuzimet e njëpasnjëshme të Brighton, për kartonin e Moises Caicedo, bënë që Mikel Arteta të përqëndronte vëmendjen e tij diku tjetër.
Jorginho bëhet kështu afrimi i tretë për Arsenal këtë merkato janari, teksa “topçinjtë” kanë firmosur dhe me mbrojtësin polak, Jakub Kiwior nga Spezia, si dhe me sulmuesin belg Leandro Trossard. Jorginho ka shënuar 29 gola në 213 paraqitje me Chelsea, teksa ka arritur të fitojë UEFA Champions League, Europa League, UEFA Super Cup dhe botërorin e klubeve me blutë.
Duke marrë parasysh afrimet e shumta të Chelsea këtë merkato, duket se trajneri Graham Potter nuk ka gjetur më hapësira për mesfushorin italian në formacion. Duke qënë se kontrata e Jorginho skadonte në verë, Chelsea ka vendosur të përfitojë prej kartonit të tij, duke shmangur largimin e lojtarit me kosto zero.
Jorginho u lind në Brazil, por në moshën 15 vjeçare emigroi drejt Italisë, ku dhe zgjodhi të përfaqësojë kombëtaren italiane në kompeticionet ndërkombëtare. Mesfushori ishte pjesë mjaft e rëndësishme e triumfit të italianëve në Euro 2020 përballë Anglisë. Gjithsesi, italianit do t’i duhet të luftojë për vendin e titullarit në ekipin e Mikel Artetës, duke marrë parasysh konkurrencën e madhe. Ndër cilësitë që diferencojnë Jorginho nga të tjerët është eksperienca në kompeticionet europiane, faktor që pritet të jetë mjaft i vlefshëm për Arsenal në vijijm.
