Teksa e ardhmja e Kylian Mbappe është ende në dyshim, Paris Saint-Germain ka bërë propozimin e rradhës për rinovim kontrate. Kësaj rradhe bëhet fjalë për një kontratë të re, sipas të cilës superstari francez do të përfitojë plot 50 milionë euro për sezon. Kjo do ta bënte Mbappe futbollistin më të paguar në botë, dhe duket se lojtari po e koinsideron seriozisht propozimin e ri të klubit parizien.
Tashmë është e qartë se e ardhmja e Mbappe është mes PSG dhe Real Madrid, por përveç propozimit të ri financiar, ka dhe një arsye tjetër se përse sulmuesi mund të refuzojë përsëri transferimin në Santiago Bernabeu. Bëhet fjalë për të drejat e imazhit të tij. Mbappe ka bërë të qartë se në çfarëdo lloj situate, ai dëshiron të zotërojë 100% të të drejtave që lidhen me imazhin e tij. Drejtuesit e PSG nuk kanë asnjë problem me këtë kërkesë, por nuk mund të thuhet e njejta gjë për Real Madrid.
Sipas GOAL, madrilenët janë në gjendje të negociojnë për një marrëveshje deri në masën 50% në këtë moment. Kjo mund të shtyjë Mbappe që të qëndrojë dhe për 1 vit tjetër tek PSG. Mamaja e futbollistit, Fayza Lamari, ka udhëtuar së fundmi drejt Katarit për t’u takuar me drejtuesit e klubit francez. Mediat në Francë bëjnë me dije se presidenti Nasser Al-Khelaifi është i gatshëm të plotësojë çdo kërkesë, me qëllimin e vetëm që Mbappe të mos largohet në verë. Nëse kjo ndodh sulmuesi do të largohet me kosto zero, duke qënë se kontrata e tij skadon në fund të sezonit.
Pas fitores së PSG 5-1 ndaj Lorient, vetëm pak javë më parë, Mbappe përsëriti dhe një herë se asgjë nuk është vendosur përfundimisht në lidhje me të ardhmen, duke mos përjashtuar një rinovim kontrate me klubin e tij aktual.
