Ronald Araujo është kthyer në një nga lojtarët më të rëndësishëm të Barcelonës gjatë 2 sezoneve të fundit. Por mbrojtësi uruguajan ende nuk ka firmosur një rinovim kontrate me klubin spanjoll, dhe kjo situatë ka tërhequr vëmendjen e ekipeve rivale në Europë, të cilat janë të interesuara në kartonin e futbollistit.
Araujo është përmirësuar dukshëm në muajt e fundit, duke konsoliduar pozitat e tij në ekip. Raportimet në Spanjë bëjnë me dije se 22 vjeçari kërkon që paraqitjet e tij të reflektohen në propozimin e ri të Barcelonës, por deri më tani, katalanasit nuk i kanë kënaqur pritshmëritë e Araujo.
Manchester United dhe Chelsea janë duke kërkuar në mënyrë aktive për mbrojtës qëndre, dhe lojtari i Barcelonës është në radarin e ekipeve angleze. Por dhe rivalët historikë të katalanasve, Real Madrid, thuhet se po monitorojnë situatën, megjithëse një transferim i bujshëm nga Camp Nou në Santiago Bernabeu ka pak gjasa të ndodhë.
Për shkak të vështirësive financiare që Barcelona po vuan, drejtuesit e klubit duhet të heqin dorë nga lojtarë të tjerë, përpara se t’i ofrojnë Araujo një marrëveshje më të mirë. Por ky mbetet një objektiv i vështirë, pasi katalanasit kanë shpenzuar shumë para për të sjellë në skuadër Ferran Torres nga Manchester City. Në të njejtën kohë, presidenti Laporta është shprehur disa herë me mjaft vetbesim se do të sjellë në skuadër bomberin e Dortmund, Erling Haaland.
Dihet se ky operacion është mjaft i kushtueshëm, dhe Barcelona duhet të bëjë sakrifica. Kontrata aktuale e Araujo me klubin është e vlefshme deri në vitin 2023. Po ashtu, edhe talenti tjetër i Barcelonës, Gavi, ka një kontratë aktive deri në vitin 2023. Por dhe ky i fundit, ende nuk ka vendosur të rinovojë, dhe mediat bëjnë me dije se po merr parasysh opsionet që ka në dispozicion.