Sipas raportimit më të fundit të Mirror në Angli, Manchester United po përgatit një ofertë zyrtare për shërbimet e bomberit të Tottenham, Harry Kane. Drejtuesit e “Djajëve të Kuq” i kanë humbur shpresat tek një transferim i mundshëm i Erling Haaland, dhe Harry Kane është emër i po të njejtit kalibër.
Kapiteni i kombëtares angleze ishte shumë pranë një lëvizjeje drejt Manchester City verën e kaluar, por presidenti i Tottenham nuk e lejoi lojtarin të largohej. Ndërkohë, ekipi i Pep Guardiolës është i përqëndruar tek Erling Haaland, dhe nuk pritet t’i bëjë konkurrencë United në objektivin e tyre të ri.
Kane do të mbushë 29 vjeç në korrik dhe ka ende 2 vite të mbetura në kontratën e tij aktuale me Tottenham. Kjo e vë presidentin Daniel Levy në një dilemë të vështirë. Nëse nuk rinovon së shpejti, vlera e kartonit të sulmuesit mund të bjerë në vitet e ardhshme. Pra klubi duhet të bindë Kane për të rinovuar, ose duhet të tregohet i shpejtë për të përfituar sa më shumë nga kartoni i tij.
Trajneri Antonio Conte ende beson se skuadra mund të sigurojë një vend në 4 më të mirët e Premier League këtë sezon. Duke u nisur nga rrethanat ky duket një objektiv i vështirë, por nëse realizohet Kane mund të bindet për të qëndruar dhe një sezon tjetër tek Tottenham. Kjo pasi anglezi e ka bërë të qartë se i pëlqen shumë të punojë me teknikun italian. Marrëdhënia e Kane me fansat e Tottenham gjithashtu është mjaft e mirë, pavarësisht se lojtari shprehu hapur dëshirën për t’u larguar në verë.
Manchester United nga ana tjetër e di se për të siguruar shërbimet e anglezit, mund t’i duhet të paguajë deri në 100 milionë paundë, shifër kjo mjaft e lartë dhe për standartet e “Djajëve të Kuq”.