Liverpool ka fituar minimalisht 1-0 përballë West Ham, duke siguruar një fitore shumë të rëndësishme në Premier League. Darwin Nunez shënoi golin e vetëm për “The Reds”, i cili ishte dhe goli i parë i uruguajanit në Anfield. Mjaft deçiziv në këtë sfidë ishte dhe portieri Alisson, i cili priti një penallti, për të mos i dorëzuar asnjë pikë kundërshtarëve.
Të besuarit e trajnerit Klopp kanë qënë të paparashikueshëm këtë sezon, por fitorja përballë West Ham ishte e treta rradhazi në të gjitha kompeticionet për Liverpool. Tekniku gjerman u shpreh i kënaqur me ekipin e tij, por nënvizoi aspektet për t’u përmirësuar në lojën e “The Reds”:
“Jam i lumtur. Në shumë pjesë të takimit luajtëm mjaft mirë. Përsa kohë po luanim ishim të jashtëzakonshëm dhe i shkaktuam West Ham shumë probleme, por problemi i vetëm ishte fakti se nuk luajtëm kështu për 95 minuta dhe u lamë atyre hapësira. Ata (West Ham) rritën riskun duke hedhur në fushë Michail Antonio dhe lojtarë të tjerë, dhe ishin mjaft të rrezikshëm me topat e gjatë… Unë nuk mendova asnjëherë se do të ishte një ndeshje e lehtë për ne, por morrëm rezultatin e duhur dhe mendoj se e merituam. Janë 3 pikë të tjera, mjaft të rëndësishme.”
Ndërkohë Klopp nuk i kurseu lëvdatat për Darwin Nunez. Trajneri gjerman tha në përfundim të takimit:
“Ai (Nunez) ishte i jashtëzakonshëm. Ai është një talent masiv dhe është vetëm 22 vjeç. Nunez erdhi nga Portugalia dhe atje nuk ishte për një kohë të gjatë, kështu që para jo shumë kohësh ai po lunate në Uruguai. Ai është një talent i madh dhe jemi të lumtur për të.”
Klopp komentoi dhe mbi penalltinë e akorduar në favor të West Ham, duke thënë se vendimi i arbitrit ishte i drejtë.
