Real Madrid nuk ka ndërmend të ndalet vetëm me afrimin e Jude Bellingham në merkaton e verës. Klubi spanjoll ka arritur akordin për termat personalë me anglezin, dhe tashmë po bisedon me drejtuesit e Dortmund për të rënë dakord mbi aspektin financiar të operacionit. Paralelisht, madrilenët po eksplorojnë mundësitë për të sjellë në Bernabeu superstarin e PSG, Kylian Mbappe, si dhe mbrojtësin e Bayern Munich, Alphonso Davies.
Përsa i përket Mbappe, kontrata që francezi firmosi verën e kaluar është 2 vjeçare, me opsionin për t’u rinovuar dhe për një vit shtesë. Megjithatë, kjo klauzolë mund të aktivizohet vetëm nga lojtari dhe jo klubi. Kjo do të thotë se Mbappe do të hyjë shumë shpejt në vitin e fundit të kontratës së tij, dhe PSG mund të jetë e hapur për oferta mbi kartonin e sulmuesit, për të mos rrezikuar largimin e tij me kosto zero. Mbappe mund të firmosë një para-kontratë me një klub jashtë Francës në janar, dhe Real Madrid do të jetë aty për të shfrytëzuar mundësinë.
Ndërkohë përsa i përket Davies, kanadezi konsiderohet jo në shitje tek Bayern, por lojtari ende nuk ka firmosur një kontratë të re me klubin. Kontrata e tij aktuale me bavarezët skadon në verën e vitit 2025, dhe mbrojtësi mendohet se është i hapur për një aventurë të re.
Real kërkon të përforcojë repartin difensiv, duke ditur se e ardhmja e Mendy në Spanjë është deri diku e paqartë. Francezi ka startuar në vetëm 15 takime në kampionat, dhe nuk ka luajtur në Champions League që prej nëntorit të vitit të kaluar. Mendohet se drejtuesit e Real Madrid janë të gatshëm të shesin Mendy në verë, nëse oferta e duhur troket në Bernabeu, por kjo do të sjellë dhe nevojën e gjetjes së një zëvëndësuesi, dhe Davies është lojtari perfekt në optikën e Los Blancos.
