Pas lajmit për rinovimin e Kylian Mbappe me PSG, dhe për 3 vite të tjera, ka reaguar presidenti i La Liga, Javier Tebas. Ky i fundit ka qënë prej kohësh një oponent i shpenzimeve të mëdha në futboll dhe i klubeve si Manchester City apo kampionët e Francës. Tebas gjithashtu kundërshtoi idenë e Superligës Europiane, teksa së fundmi është shprehur i “inatosur” me lëvizjen e fundit të PSG.
Në një postim në mediat sociale, Tebas u shpreh:
“Ajo që PSG po bën duke rinovuar me Mbappe në këto shifra, pasi ka humbur 700 milionë euro në sezonet e fundit dhe duke patur më shumë se 600 milionë euro shpenzime në paga si klub është një fyerje për futbollin.”
Sipas një raporti të publikuar më herët këtë muaj nga Ligue de Football Professionnel në Francë, PSG humbi plot 224.3 milionë euro gjatë sezonit të kaluar. Ndërkohë në sezonin 2019-2020, kampionët e Francës humbën 124.2 milionë euro, për shkak dhe të ndërprerjes së kampionatit nga pandemia e COVID-19. Por kjo duket se nuk ka ndalur PSG t’i ofrojë Mbappe një kontratë të padëgjuar më parë përsa i përket termave financiarë, për të mbajtur futbollistin në Paris.
Tebas gjithashtu sulmoi presidentin e PSG, Al-Khelaifi, duke thënë se ai është po aq i rrezikshëm sa ideja e Superligës. La Liga ndërkohë gjithashtu reagoi për kontratën e re të Mbappe, duke përsëritur shumë prej akuzave të presidentit Tebas. Sipas autoritetit më të lartë të futbollit në Spanjë, është skandaloze që një klub si PSG të pranojë një kontratë të tillë, ndërkohë që klube të tjera që janë të gatshme t’i paguajnë Mbappe të njejtën pagë, nuk kanë shans të përfitojnë kartonin e lojtarit. La Liga akuzoi klubin francez se nuk po respekton rregullat e lojës së ndershme.
